Un milleiro de nenos e nenas reivindicaron o uso do galego nunha nova edición do Correlingua, celebrada este venres na cidade herculina. O concelleiro da área de Fomento e Promoción da Cidade, Gonzalo Castro, participou no acto que tivo lugar na contorna da Torre de Hércules.

O obxectivo desta xornada é o fomento do uso da lingua galega entre as xeracións máis novas, algo que se estende ao resto do ano con diferentes iniciativas levadas a cabo nos centros de ensino. “Hoxe estamos todos aquí por un obxectivo común: mostrar o noso compromiso pola lingua galega, un patrimonio de valor incalculable e que debemos coidar con agarimo desde que somos pequenos“, sinalou Castro.