O presidente da Xunta, Alfonso Rueda, recibiu este luns en Santiago aos xogadores e membros da directiva do Leyma Basquet Coruña tras o seu ascenso á liga ACB. “Estamos moi orgullosos”, remarcou, antes de lembrar que a próxima tempada serán dous os “equipos galegos que xoguen na máxima categoría” do baloncesto profesional en España (o Breogán logrou a permanencia).

Acompañado polo conselleiro de Presidencia, Xustiza e Deportes, Diego Calvo, o titular do Goberno autonómico felicitou ao equipo e ao corpo técnico polo traballo realizado durante toda a tempada, agradeceulles a súa aposta “pola canteira” e a súa contribución a facer “marca Galicia” alá onde disputen un encontro. “Ídesnos a representar, levar o nome da vosa cidade e de Galicia fóra da comunidade”, resolveu.