O Concello da Coruña arrinca a preparación do San Xoán establecendio a regulación para as actividades relacionadas coas festas.

Segundo avanza o goberno local, a alcaldesa, Inés Rey, fará público esta semana o bando informando as pautas que deberán seguirse para levar a cabo sardiñadas, churrascadas ou grelladas, así como fogueiras durante a noite de San Xoán.

Tamén inclúe información do servizo especial de transporte urbano, os cortes de tráfico no paseo marítimo e na contorna das praias de Riazor, Orzán e Matadoiro, así como a colocación de tres puntos violetas.

O día 23 de xuño estarán permitidas, sen necesidade de comunicación previa a Seguridade Cidadá, as sardiñadas e churrascadas, a condición de que non ocupen a calzada nin entorpezan a circulación de vehículos.

Deberanse realizar entre as 13.00 e as 16.00 horas, e entre as 20.00 e as 00.00 horas. Para iso, haberá que cumprir unha serie de medidas de seguridade como son a distancia entre grellas ou a elevación do chan.

Entre o 14 e o 30 de xuño tamén se poderán levar a cabo sardiñadas, churrascadas ou similares, a condición de que se remita unha comunicación previa por escrito á área de Seguridade Cidadá cun mínimo de 48 horas de antelación.