A Policía Local de Cambre interceptou, o pasado fin de semana, ao condutor dun vehículo que duplicaba a taxa máxima de alcol permitida en aire expirado.
Os feitos, informa o consistorio, ocorreron na madrugada do festivo cando a patrulla nocturna que realizaba as tarefas de vixilancia sorprendeu ao condutor dun vehículo que circulaba a gran velocidade pola zona do Paraugas do Amorne.
Ao darlle o alto, os axentes municipais sospeitaron que o home podía estar baixo os efectos de bebidas alcohólicas polo que decidiron sometelo a unha proba de alcoholemia. O test arroxou un resultado positivo, duplicando o condutor a taxa máxima permitida.
Finalmente, a Policía Local formulou unha denuncia administrativa, o que leva, non só unha sanción económica, senón tamén unha perda de puntos no permiso de condución.
DENUNCIA ADMINISTRATIVA
Por outra banda, a noite do pasado sábado a patrulla da Policía recibiu unha chamada dun particular que alertaba de que un mozo estaba a realizar grafitis na zona do Amorne.
Os axentes desprazáronse ata a zona e localizaron ao mozo, que levaba consigo varios sprays e ao que, finalmente, interpúxoselle unha denuncia administrativa por incumprir a ordenanza municipal.
