A Universidade da Coruña (UDC) e a CIG asinaron un acordo de subida salarial desde 2022 a todo o persoal da institución “á que se lle negaba este dereito”, sinala a central sindical. O acordo evita a vía xudicial do conflito colectivo presentado pola CIG, recoñecendo o dereito ás subidas retributivas a todo o persoal de investigación, equiparado deste xeito co funcionario e laboral.

De forma inmediata, explica a central sindical, “supón unha subida mínima do 7% na nómina de outubro que poderá chegar ao 9 ou 9,5% cando se aplique a subida xeral para o persoal das administracións públicas, correspondentes ao ano 2024”. Ademais, en xuño terá lugar unha negociación para fixar os prazos para o pago dos atrasos derivados dos anos 2022 e 2023 que suman un 7 por cento.