A Policía Nacional detivo aos dous autores de cinco roubos con forza en vehículos cometidos nun garaxe comunitario da cidade herculina, segundo informa. Durante a madrugada do día 20 de maio, varios coches estacionados no interior dun garaxe comunitario da rúa Independencia, rexistraron roubos no seu interior.

Todos eles presentaban danos, con portelos fracturados. Nalgúns deles, conseguirían subtraer diferentes efectos e documentación. Esa mesma noite, tras unha chamada ao 091 dun dos afectados, varios indicativos do Grupo de Atención ao Cidadán acoden ao lugar. No garaxe localizan un total de catro coches cos portelos fracturados e un quinto vehículo violentado na vía pública, á saída do portal do edificio.

Inmediatamente realizan unha procura do autor dos feitos polas rúas próximas, localizando a dous homes que portaban parte dos efectos subtraídos e que presentaban cortes nas mans.