Mariscadores da ría do Burgo protagonizaron este venres unha nova protesta para demandar a prórroga de axudas tras a conclusión das obras de dragado e mentres non poidan mariscar. Foi con novo corte de tráfico na zona da Pasaxe e unha concentración coa participación dunhas 40 persoas, segundo os convocantes, que mantiveron a protesta algo máis dunha hora. Todo iso sen especiais incidencias no tráfico ao cortarse só un tramo, con “pouca retención e tráfico fluído”, precisaron a Europa Press desde o Centro de Control de Tráfico do Noroeste.

Pola súa banda, Andrés Pena, presidente dos mariscadores do montón, avanzou que continuarán coas mobilizacións para que se manteñan as axudas ata que o marisco que se semente alcance a talla de comercialización e para que se executen actuacións que emenden obras que “quedaron mal feitas”. Tamén demandou unha reunión a Xunta e Goberno. “O 26 de abril acabáronsenos as axudas”, recalcou.