Un total de 64 deportistas competirán desde este venres, día 14, ata o domingo 16 na Coruña no VII Open Náutico Esfuerza que organiza a Fundación María José Jove. Segundo informa a entidade, a competición abarca as categorías de vela e piragüismo adaptado, así como a de vela adaptada con acompañante “para aqueles regatistas que precisen algún tipo de axuda para o goberno do barco”.

O obxectivo desta iniciativa, apunta, é que regatistas, adestradores e acompañantes “poidan intercambiar impresións acerca das súas vivencias co deporte náutico adaptado e fomentar a práctica do deporte como canle de inclusión social e mellora da autonomía persoal“. Na Regata de Vela Adaptada competirán embarcacións da clase Yatlant 460 e a competición de piragua será en kaiaks autobaleirables Rotomod Ocean Duo, de modo individual (K1 mixto) ou por parellas (K2 mixto). Premiaranse aos tres primeiros clasificados de cada unha das modalidades.