A alcaldesa da Coruña, Inés Rey, reivindicou a xestión do goberno local nestes anos, nunha comparecencia ante os medios de comunicación para facer balance e na que destacou o “diálogo” municipal coa oposición e outras administracións. “Conseguimos que trate á cidade como se merece”, dixo tamén sobre a Xunta.
Así o manifestou ao facer balance dos cinco anos de mandato do PSOE na cidade herculina, a cal se converteu, na súa opinión, nun “referente indiscutible do noroeste peninsular ao nivel das grandes cidades europeas”. “A Coruña viviu a transformación urbana, social e cultural máis importante das últimas décadas”, resumiu para apuntar que “a segunda gran modernización está en marcha”.
En canto á fachada marítima, destacou que “este mes” se aprobará a creación da comisión con representantes de todas as administracións “para ir definindo o cronograma para os próximos anos”. Ademais, anunciou que o novo contrato da planta de residuos de Nostián “sairá a contratación nos próximos seis meses”.
OUTROS COMPROMISOS
Antes de final de ano, comprometeuse tamén a que “quede definida a ordenanza das terrazas”, a pechar a licitación do novo contrato de transporte urbano e da xestión de centros deportivos, así como das obras para rehabilitar o mercado de Santa Lucía. Xunto a iso, sumou a implantación do plan de parques infantís 2025-2030 que terá o obxectivo de que haxa un “a menos de 10 minutos para cada familia”.
EIXOS POLÍTICOS
No seu balance dos últimos cinco anos, a rexedora explicou que o goberno traballou “de maneira coordinada”, centrado en tres eixos políticos “fundamentais” como son a dinamización económica, o benestar social e o fomento e promoción da cidade. En concreto, apuntou a “un cambio na mobilidade urbana” e a un modelo económico e industrial con “dous grandes proxectos tecnolóxicos”, a Cidade do TIC e a Axencia Española de Supervisión de Intelixencia Artificial (Aesia), da que dixo que se constituirá a sociedade xestora “antes de que acabe o ano”.
Rey recalcou tamén, entre outras cuestións, que durante o seu mandato deron impulso a grandes infraestruturas, “en colaboración con outras administracións e tras dúas décadas prometidas”, como a estación Intermodal, o acceso ferroviario a Punta Langosteira ou a ampliación do complexo hospitalario universitario da Coruña (Chuac).
En canto ao pasado, indicou que en 2019 a cidade estaba “crispada e en parálise, con cuestións centrais bloqueadas”, mentres na actualidade “mira ao 2030 con dinamismo e multitude de iniciativas, sendo, sen discusión, o motor de Galicia”. Non entanto, Rey recoñeceu que “é posible mellorar a xestión e a velocidade” do traballo.
