O Concello da Coruña iniciou hoxe a notificación aos propietarios e propietarias de inmobles cualificados como vivendas de uso turístico da necesidade de comunicación previa da actividade para a súa regulación. Trátase das vivendas inscritas pola Axencia de Turismo de Galicia no rexistro de Empresas e Actividades Turísticas, de acordo co seu uso terciario de hospedaxe e non residencial.
“Para desenvolver a actividade, a propiedade do inmoble deberá presentar o impreso de comunicación previa de actividades de uso turístico na vivenda, remitido polo Concello coa notificación”, explica o consistorio.
Ademais engade que, de acordo cos usos turísticos admisibles no Plan Xeral de Ordenación Municipal (PXOM), “non se permite implantar actividades de uso turístico nin terciarios sobre pisos ou locais destinados a vivendas de uso residencial”.
Das rexistradas como uso terciario, son admisibles como vivendas de uso turístico as situadas na planta baixa e planta primeira nos edificios de vivendas nos que se permita o uso hostaleiro e hoteleiro e en edificio exclusivo.
Por outra banda, de acordo co Plan Especial de Protección da Cidade Vella e Pescadería, poderán admitirse edificios exclusivos xunto cos localizados en planta baixa e plantas altas vinculadas á planta baixa en zona PEPRI (Ensanche e Pescaría Norte), precisa.
