O dispositivo especial despregado pola Garda Civil de Tráfico con motivo da celebración de San Juan na Coruña saldouse con 78 propostas de sanción, segundo informou a Comandancia. Debido ao notable incremento de desprazamentos por estrada na provincia durante a madrugada e a mañá do 24 de xuño, especialmente nos arredores da cidade da Coruña, a Garda Civil despregou un dispositivo con mobilización de recursos adicionais.

A principal preocupación dos axentes centrábase nos desprazamentos de regreso tras os festexos e, en base a datos de anos anteriores, esperábase un “significativo número de condutores baixo os efectos do alcol ou drogas, aumentando o risco tanto para eles mesmos como para o resto dos usuarios da vía”.

O dispositivo contou con máis de 50 axentes distribuídos por toda a provincia, con case unha vintena de patrullas operando nos arredores da cidade herculina, co fin de previr condutas perigosas e sancionar aos condutores que puidesen representar un risco.

Finalmente, tramitáronse 78 propostas de sanción, das que 63 foron por conducir superando a taxa máxima de alcoholemia (o que pode supor multas de ata 1.000 euros e retirada de ata 6 puntos do permiso de conducir). Outras 9 denuncias foron por circular baixo os efectos das drogas, e chegáronse a detectar casos de condutores que deron positivos en tres sustancias (THC, anfetaminas e metanfetaminas).

Por outra banda, seis condutores están a ser investigados por delito contra a seguridade viaria ao superar a taxa de 0,60 mg/l no test de alcoholemia.