O concelleiro de Urbanismo, Rehabilitación e Vivenda do Concello da Coruña, Francisco Díaz Galego, presidiu este xoves a mesa sectorial creada desde o Concello con todos os representantes de entidades afectadas polo desenvolvemento das vivendas de uso turístico (VUT).

Estiveron presentes representantes da federación de asociacións veciñais, de promotores inmobiliarios, de administracións de leiras e de colexios de arquitectos, así como da asociación de vivendas turísticas, entre outros.

Na reunión da mesa, a terceira que ten lugar, o concelleiro explicou os pasos que está a dar o goberno municipal para establecer a regulación.

Desde este mes e ata finais de xullo, indicou Díaz Galego, o Concello enviará as notificacións correspondentes aos 1.277 propietarios de vivendas turísticas que constan na cidade, notificacións nas que se lles indica a necesidade de darse de alta como actividade económica e explícaselles a normativa municipal para as ditas vivendas.

A normativa municipal limita desde o Plan Xeral de 2013 a instalación de VUT, que deben cumprir uns requisitos. Así, en zona do plan de especial protección (Pepri) só poderán ocupar edificios completos e plantas baixas.