Un home de 88 anos, con iniciais J.S.M., faleceu este martes cando se bañaba na praia de Riazor, na Coruña. Os feitos producíronse pouco antes das 11.00 horas no areal coruñés. Segundo informou o 112 Galicia, un socorista solicitou a intervención dos profesionais sanitarios tras sacar á vítima da auga. Ata o lugar, o Servizo de Urxencias Sanitarias de Galicia-061 enviou unha ambulancia de soporte vital avanzado medicalizada e o equipo médico realizou manobras de reanimación cardiopulmonar ao home, pero nada se puido facer por salvarlle a vida.

No operativo, ademais do Servizo de Urxencias Sanitarias de Galicia-061, tamén foron mobilizados efectivos da Policía Nacional e da Policía Local.