Modestia Aparte, Los Toreros Muertos, Amistades Peligrosas e OBK actuarán este martes dentro das festas de María Pita e o festival ‘Tolos pola música’, que comezará ás 20.30 horas. Será, explica o Concello da Coruña, dentro da programación prevista con propostas para todos os públicos. Xunto a eles estarán Un Pingüino en mi Ascensor e Hechizo, unha homenaxe a Héroes del Silencio.
Este martes tamén continuará o festival Noroeste Estrella Galicia, na súa sección de contos do Noroeste e Noroestiño que, por primeira vez, leva as artes escénicas a este evento musical. Roi da Costa forma parte da sección Contos do Noroeste e interpretará o seu espectáculo ‘A miña vida sendo outro’, un show de improvisación e imitación. Pola súa banda, na sección Noroestiño haberá un espectáculo musical para todos os públicos chamado ‘Home orquestra’.
Ademais este martes poderanse retirar as invitacións para asistir aos concertos programados no castelo de San Antón dentro do Festival Noroeste Estrella Galicia. Poderán retirarse nos despachos de billetes da praza de Ourense entre hoxe e o martes e en Ataquilla, a partir do martes. O festival incluirá tamén os concertos en praia de Riazor con Fillas de Cassandra; Xoel López e Crystal Fighters, o día 9, e o día 10 Triángulo de Amor Bizarro, Vetusta Morla e The Rapants.
