A alcaldesa da Coruña, Inés Rey, trasladou “nos próximos días” podería estar normalizada a situación respecto do lixo acumulado nas rúas, ante a folga indefinida convocada polo persoal deste servizo.

“Parece que empeza a aumentar a recollida na quenda de noite coas novas contratacións da empresa”, expuxo ao ser preguntada tamén polo reforzo durante o día por parte de Valoriza, a empresa contratada ao declararse a emerxencia sanitaria e que agora actúa en dúas quendas, entre as 07.15 horas e as 23.15 horas.

En concreto, este luns púxose en marcha a nova quenda de limpeza tras a ampliación da emerxencia sanitaria a toda a cidade. Outros 22 operarios de Valoriza sumáronse aos 32 que xa estaban a traballar previamente.

Na xornada de onte, a empresa de emerxencia que reforza a recollida de residuos na cidade recolleu un total de 71,5 toneladas de lixo, sen incidentes. Desde a posta en marcha da recollida de emerxencia dos residuos acumulados nas rúas, os operarios de Valoriza xa recolleron un total de 747,5 toneladas.

Por outra banda, durante a noite do luns 5 a este martes 6 de agosto non se rexistrou ningún incidente por queima de colectores. Con todo, desde o pasado 24 de xuño, o Concello contabilizou “159 colectores queimados intencionadamente nos diversos distritos da cidade”.