O operativo para remolcar un avión no aeroporto de Alvedro o pasado 14 de xullo estivo marcado pola “descoordinación e apresuramento”, o que provocou un accidente que se saldou coa amputación da perna dun operario.
Así o recolle a información preliminar da Comisión de Investigación de Accidentes de Aviación Civil –dependente do Ministerio de Transportes–, que deberá publicar un informe técnico final coas conclusións. O suceso tivo lugar preto das 20,00 horas do 14 de xullo, cando a aeronave Airbus 320 “estaba a ser remolcada cara atrás con xiro na plataforma para orientala en rodaxe con dirección norte cara á cabeceira da pista 21 por medio dun tractor con barra”.
Segundo recolle a ficha de investigación aberta, houbo dificultades ao desenganchar a barra de pulo do tractor polo operario. “Ao tentar solucionar o problema produciuse unha certa descoordinación e apresuramento entre os operarios de terra: coordinador, operario da barra e operario do tractor, de modo que se acumularon varias accións desviadas dos procedementos operativos”, expoñen as indagacións.
Neste proceso pediuse á tripulación que liberase o freo de aparcadoiro do avión e o operario que manexaba o tractor baixouse deste. De tal forma, o operario, “no intento de soltar ou desenganchar a barra de pulo do avión, quedou atrapado e unha roda do tren de morro lesionoulle gravemente unha perna”.
Finalmente, o home recibiu auxilio médico no lugar dos feitos e, posteriormente, foi trasladado ao hospital. Necesitou ser intervido cirurxicamente debido á amputación dunha perna.
