A empresa que reforza a recollida de residuos na Coruña, ante a folga indefinida que mantén o persoal da concesionaria, Prezero, recolleu na xornada de onte un total de 66,6 toneladas de lixo, segundo informa a comisión de seguimento tras declararse a emerxencia sanitaria en toda a cidade. Desde a posta en marcha da recollida de emerxencia polos residuos acumulados nas rúas, os operarios de Valoriza, a empresa á que recorreu o consistorio, xa recolleron un total de 814,1 toneladas. Nas últimas horas non se rexistraron incidencias, excepto na tarde do martes un colector de vidro incendiado na rúa Torno, precisa a comisión.

Por outra banda, a preguntas dos xornalistas, a alcaldesa, Inés Rey, manifestou que esta noite as porcentaxes de recollida “foron superiores” en relación ao sucedido en semanas pasadas en canto ao traballo que realizan de noite os operarios de Prezero. “A situación está case normalizada, quedan algúns puntos aínda por recoller, queda tamén acumulado papel, cartón e vidro que se irá regularizando esta semana”, dixo sobre a retirada destes últimos. Especialmente, a rexedora destacou a “mellora notable” en barrios “por onde non se podía nin pasar pola rúa”. “Esperamos que nos próximos dias estea normalizado”, apostilou.