O Concello da Coruña e a Xunta de Galicia traballarán conxuntamente na redacción dun plan estratéxico orientado a impulsar a actividade do Consorcio para a Promoción da Música nos próximos anos “co obxectivo de incrementar os ingresos económicos anuais do organismo”.
Esta medida adiantouse este luns durante a Xunta de Goberno do Consorcio, “na que se fixo fincapé no imprescindible de protexer a excelencia artística da Orquestra Sinfónica de Galicia (OSG) e tamén do seu proxecto educativo e didáctico, no contexto do programa SonFuturo e a Escola Municipal de Música”, informa o goberno local.
A este respecto, subliñouse “a importancia de abrir novas vías de financiamento tanto para sustentar a actividade habitual do Consorcio como para reforzar a súa programación cultural”.
Unha das posibilidades ás que se apuntou hoxe foi a de apostar por iniciativas de colaboración público-privada con vistas a equilibrar, a curto e medio prazo, as contas anuais do Consorcio, para o que se aprobou un recoñecemento de crédito de 428.000 euros de face a sufragar investimentos e contratacións correspondentes ao ano pasado.
En relación a este asunto, o grupo municipal do BNG reiterou a súa preocupación “polos problemas estruturais” da entidade e insiste na necesidade dun plan estratéxico “que garanta a súa viabilidade a longo prazo”.
