O alcalde de Oleiros, Ángel García Seoane, de Alternativa dos Veciños reivindicou a figura de Fidel Castro, no acto de conmemoración dos 98 anos de nacemento do mesmo, nomeado concelleiro honorífico deste municipio. Foi en Láncara, na casa na que naceu o pai de Fidel Castro, e que contou, segundo informa o consistorio, coa participación do Embaixador da República de Cuba, Marcelino Medina; o presidente da Asociación Amizade Láncara-Cuba, Antonio Sobrado, e outros representantes.

Durante a súa intervención, o alcalde de Oleiros encomiou a figura de Fidel Castro. “Máis aló das miñas experiencias persoais con Fidel, todos sabemos que se trata dunha das máis destacadas figuras políticas e humanas do século XX”. “Esa loita sen cuartel pola igualdade das persoas, por crear un mundo no que todos podamos vivir con dignidade, marcou sempre a actitude política e persoal de Fidel”, indicou tamén.