O Concello da Coruña culminou o plan de ampliación e mellora do sanatorio de focas do Acuario,, que conta cunha nova piscina médica de illamento ideada par o seguimento da saúde das mesmas.

A alcaldesa, Inés Rey, visitou esta mañá o sanatorio de focas, onde xa terminaron as obras de renovación e mellora promovidas polo Concello co obxectivo de dispor dunha zona de coidados “máis preparada, versátil e segura á hora de atender as especies”.

Cun investimento de 110.000 euros, o plan de melloras no sanatorio incluíu, por exemplo, a creación dunha nova piscina médica de illamento, recinto que contará cunha subministración continua de auga salgada.

Ademais, habilitáronse dous espazos diferenciados, en húmido e seco, para tratar as focas segundo as súas necesidades de acordo co prescrito para algúns tratamentos, como pode ser a protección da luz exterior. Por outra banda, instaláronse portas corredeiras para pechar a área técnica de manexo dos animais e, desta forma, poder illar en seco as especies atendidas.