Membros do Servizo de Vixilancia Aduaneira e da Policía Nacional levaron a cabo un operativo, no marco das actuacións de loita contra o narcotráfico, con rexistro dun veleiro no porto da Coruña, pero con resultado negativo. Desde o Ministerio de Facenda informaron a Europa Press que a investigación se iniciou en Cataluña e que cando o veleiro estaba preto de Galicia a embarcación de Vixilancia Aduaneira, con base na Coruña, saíu ao seu paso o domingo.

Ese día realizouse un primeiro rexistro sen localizar nada, precisaron as mesmas fontes. Posteriormente, o veleiro atracou no porto da Coruña. Unha vez aí, o luns fíxose outro rexistro “con resultado negativo”. Durante o mesmo detívose a tres persoas, os tripulantes, que quedaron en liberdade.