As Festas do Barrio Oza-Gaiteira arrincan este venres 16 de agosto coa a popular xornada de festas ás 11:00 da mañá cunha alborada polo barrio a cargo do Grupo Donaire, da Asociación Cultural do mesmo nome creada en 2000 para recuperar, promover e difundir o folclore galego. A súa escola con gaitas, pandereitas, tamborís, bombos e pandeiros animará as rúas.
A sesión vermú, que non pode faltar, será a partir das 13.00 na rúa Gaiteira, tamén coa compaña do Grupo Donaire.
Recuperando a lenda do Dragón
Despois do xantar os festexos trasladaranse á Praza da Cubela, epicentro escollido para as actividades en memoria do Dragón da Gaiteira, unha lenda que quere ser recuperada: a do pescador Joseph Ibn Hayyim quen, en 1471, acudía ao río Monelos para revisar as nasas e buscar se había anguías… ata que atopou un dragón. O dragón de Monelos. Ninguén máis o viu nin o creu pero esta fermosa historia chegou ata hoxe.
Ás 16.30 horas, na Fonte da Memoria, ábrese o Punto de Recollida da memoria do barrio, proxecto que comezou en 2017 e ao que agora quéreselle dar novo impulso para conseguir facer un mapa patrimonial coas achegas das fotos de veciñas e veciños. Ao tempo, e de 16.30 a 19.30, haberá xogos populares, un pasarúas do Dragón da Gaiteira ás 17.00 para pechar ás 20.00 co espectáculo de circo familiar de Patty Diphusa, clown con risas garantidas.
Á noite, tras do pregón que farán ás 21.30 Pablo Díaz e Olga Kirk, comezará o concerto de Catuxa Salom unha creadora que, como ela mesma explica, fai “unha potaxe musical coas miñas raíces arxentino-galegas”. Esta artista forma parte dunha xeración cansa do ritmo da cidade que decidiu vivir nunha aldea de Lugo onde nace a súa música, un canto ás raíces onde o folklore galego fusiónase con ritmos tribais latinoamericanos cun envoltorio electrónico.
E o peche final porano Loita Amada ás 23.00. O novo proxecto de músicos que chegan co oficio de bandas como Xenreira, A Matraka Perversa ou NAVE e que, liderados por Jasper, volven á carga con canción protesta galega.
