A Asociación Española Contra o Cancro e a Sociedade Española de Bioquímica e Bioloxía Molecular (SEBBM) celebran o 5 de setembro a xornada ‘Onde estamos e onde imos en investigación en cancro’ no Palacio de Exposicións e Congresos da Coruña (Palexco).

Segundo explican os organizadores, este evento forma parte das actividades programadas dentro do 46º congreso da SEBBM, convocado na cidade herculina entre o 3 e o 6 de setembro.

No transcurso da sesión, engaden, que se dividirá en dúas mesas redondas, intervirán 15 participantes “de diferentes perfís”, entre os que se atopan persoal investigador, representantes institucionais, xornalistas e pacientes, para dar “unha visión integral sobre o cancro e a investigación oncolóxica”.

En concreto, na primeira, titulada ‘Onde estamos en investigación e tratamento do cancro’, abordaranse os cambios no tratamento, o diagnóstico e o manexo de pacientes con cancro nos últimos anos, os tumores que requiren de maior atención, a importancia de asociacións como a Asociación Española Contra o Cancro e dunha adecuada comunicación e transferencia de coñecemento cara á sociedade ou as necesidades dos pacientes, entre outras cuestións.

A segunda mesa redonda, ‘Cara a onde imos en investigación e tratamento do cancro’, centrarase no futuro dos tratamentos e as áreas de investigación “con maior potencial”, as formas de inmunoterapias máis relevantes, os aspectos a mellorar na transferencia de coñecemento desde os laboratorios aos pacientes e a necesidade de aumentar o interese das empresas para incrementar o financiamento da investigación en cancro.