O artista asturiano Rodrigo Cuevas presentará este xoves, día 29, na Coruña o seu último traballo, ‘Manual de Romaría’. Farao no anfiteatro de Santa Margarita, na antesala dunha romaría que amplía a catro días a súa programación con “numerosas actividades e actuacións para todo tipo de públicos, vinculadas todas elas co baile e a música tradicional galega”, segundo informa o Concello da cidade herculina.

Cuevas, galardoado co Premio Nacional das Músicas Actuais, mostrará na Coruña a súa reinterpretación do folclore “con ritmos que mesturan tradición e modernidade”, precisa o Consistorio. As últimas entradas para a súa actuación continúan á venda a través de Ataquilla. O espectáculo comezará co grupo Pansenfron ás 21,00 horas.