A pesar de exisitir un acordo dende 2013 no Plan Xeral de Ordenación Municipal para destinar a zona do Pazo dos Serrano (ou Villa Celina, como se lle coñece de Vilaboa) a un parque público; e a pesar de que o Concello leva arredor de 10 anos instando á familia a rehabilitalo, o Concello de Culleredo pretende construír unha urbanización e un completo hoteleiro no espazo.

O Concello intenta aprobar un Plan Especial de Reforma Interior (PERI) (aprobado inicialmente en Xnta de Goberno o pasado 11 de decembro de 2023) a iniciativa de Aliseda, inmobiliaria propiedade da multinacional Blackstone e do Banco Santander.
”O PERI aprobado inicialmente elimina a maior parte do conxunto do Pazo para ser ocupada con edificacións que desfiguran a tipoloxía das edificacións existentes, alterando gravemente o conxunto histórico que conforma o núcleo do Rueiro”, aseguran dende o BNG.

Ante esta situación, o grupo da oposición vén de presentar para o seu debate no Pleno do vindeiro xoves unha moción para rexeitar a aprobación do plan especial, e fixar o espazo para parque público.

O BNG afirma que se consegue salvar o edificio do proceso especulativo, iniciará do procedemento para a súa declaración como Ben de Interese Cultural.

Pois lembran que Villa Celina é un conxunto patrimonial que conforma o eixo central do Rueiro, un dos núcleos históricos da parroquia de Rutis. Un conxunto perfectamente delimitado e indivisíbel que integra un edificio residencial, unha capela e incluso unha árbore senlleira, así catalogada pola Xunta. “Todo o conxunto representa un patrimonio que debe ser protexido e posto en valor, non só pola súa propia singularidade, máis tamén pola parte integral que supón do núcleo poboacional do que forma parte, cunhas características únicas no noso concello”, apuran dende o BNG.

.