Dúas persoas resultaron feridas na noite deste pasado xoves tras saír da vía mentres circulaban por unha parroquia da localidade coruñesa de Cambre. Tal como informa o 112 Galicia, os feitos ocorreron minutos antes das 22.00 horas e foi un particular o que alertou aos servizos de emerxencias tras observar o sinistro, que aconteceu no lugar de Altamira Arriba, en Anceis, Cambre.

Segundo o seu relato, un coche saíuse da calzada e estaba a empezar a botar fume pola zona do motor. Ademais, varias persoas estaban a tratar de retirar a unha ocupante do interior do vehículo.

Así, desde o Centro Integrado de Atención ás Emerxencias solicitouse a colaboración dos servizos sanitarios de urxencias, dos Bombeiros de Arteixo, da Garda Civil de Tráfico e do servizo municipal de emerxencias. Finalmente, os profesionais sanitarios confirmaron que no interior do automóbil había un ferido, que xa estaba fóra cando chegaron os bombeiros.

Con todo, atopouse un segundo ferido nunha zona de monte próxima, que saíra despedido do vehículo no momento do impacto.