Mariscadores e mariscadoras da ría do Burgo demandaron o pago de axudas mentres non poidan faenar tras a finalización das obras de dragado, á espera de que crezan as crías, nunha nova protesta con corte de tráfico na ponte da Pasaxe.

“Hai que acabar con esta miseria que se está sufrindo na ría do Burgo“, denunciou o portavoz do colectivo, Manuel Baldomir, tras anunciar a convocatoria dunha nova mesa de negociación o día 23 deste mes. “Esperemos que poida acudir representación do Goberno estatal e pódennos dar respostas favorables”, recalcou.

Neste sentido, Baldomir lembrou que o Executivo central e a Xunta “dixeron en moitas ocasións que había que dar unha solución” a esta problemática “tan dura”. A situación afecta ás 74 familias que vivían do marisqueo nesta zona e que unha vez finalizadas as obras de dragado e acometida a sementeira ata que poidan faenar deben esperar entre 18 e 24 meses.

“Non temos ningún tipo de saída económica, é moi duro ter que estar en casa sen poder faenar”, lamentou o portavoz do colectivo. Fíxoo nunha mobilización con corte de tráfico na ponte da Pasaxe dirección saída da cidade herculina, sen maiores incidencias.