O Xurado da XIII edición dos Premios Rebulir da Cultura Galega 2024, xa decidiu os seus galardoados. Uns premios que nacían en 2012, como recoñecemento a persoas/colectivos que contribúan á difusión e posta en valor da cultura autóctona nas súas diferentes manifestacións.

E unha das recoñecidas, na categoría de Artes Escénicas é Isabel Risco. O xurado valorou pola súa dilatada traxectoria no mundo da interpretación con diferentes públicos e rexistros, levando a Nabiza Girl por todo país, entre outras numerosas interpretacións.

A superheroína herculina Nabiza Girl, dá o salto á animación para animar á mocidade a usar o galego

Ademais, na categoría Musical o xurado recoñece ao grupo Treixadura, despois de mais de 30 anos de traxectoria dende Redondela; na categoría Homenaxe ao Colectivo da Asociación de Gaiteiros/as Galegos/as (AGG); e fan unha Mención Honorífica á Emigración Galega en Cataluña polo mantemento e promoción da cultura galega no exterior.

Grandes nomes

Un dos aspectos que defende este galardón é a proxección do nome de Galicia alén das súas fronteiras, facendo fincapé no establecemento de vínculos interculturais e de raíz. Entre os/as premiadas están nomes de recoñecido prestixo como Luis Zahera, Xurxo Fernandes, Fuxan os Ventos, Méndez Ferrín, Celso Fernández Sanmartín, Xabier Diaz, Guadi Galego, Rosa Cedrón, Uxia, Leilía, Rubén Riós, Antonio Durán “Morris”, María do Ceo, Carlos Blanco, Marcos Pereiro e Xose Antonio Touriñán, Xosé Ramón Gayoso, Xose Manuel Piñeiro, Mercedes Peón, Fina Calleja, Anxo Angueira… entre outros/as.

Acto de entrega

O acto de entrega de ditos galardóns o sábado 21 de Decembro de 2024, as 19:00 h. no marco da Gala Central do FIR_2024, a cal se celebrará previsiblemente no Complexo Rogelio Garcia Yañez de O Picouto (Concello de Ramirás).