O Aeroporto da Coruña contará, a partir do 1 de novembro, con Joan Ibáñez Ferrer como novo director da infraestrutura aeroportuaria, segundo informa Aena. Joan Ibáñez ocupa na actualidade o cargo de director no Aeroporto de Logroño-Agoncillo, “onde realizou unha importante mellora dos servizos e instalacións e onde liderou con éxito o establecemento dunha escola de pilotos”.
O novo director do aeródromo coruñés, enxeñeiro Industrial pola Universidade Politécnica de Valencia e experto profesional en Xestión de Activos pola UNED, iniciou a súa carreira profesional en Aena en 2016. Tras ocupar distintos postos nos servizos centrais da compañía e no Aeroporto Adolfo Suárez Madrid-Barallas, foi nomeado director do aeroporto logroñés en xaneiro de 2023.
Joan Ibáñez substitúe na dirección do aeródromo coruñés a Jesús Campo Huertas, quen ostenta o cargo desde maio de 2013 e que continúa a súa carreira profesional na compañía como director de Operacións e Infraestruturas do Grupo de Aena Brasil.
