A alcaldesa da Coruña, Inés Rey, e a presidenta da xunta reitora da Comunidade de Propietarios do polígono de Pocomaco, Lucía López, asinaron, no Palacio Municipal de María Pita, o convenio que permitirá regularizar a situación do polígono máis de medio século despois da súa construción.

O acordo referenda así un asunto que xa foi aprobado anteriormente no pleno municipal co obxectivo de culminar o procedemento legal de cesión de espazos viarios, zonas verdes e espazos públicos.

Isto suporá, na práctica, que o consistorio asumirá o mantemento e mellora destes espazos do polígono e, a futuro, poderá executar investimentos públicos que axuden a modernizar Pocomaco, segundo o goberno local.

Ademais, ao subscribir o convenio, o concello pasará a asumir as tarefas de limpeza viaria e recollida de lixo nos viarios do citado polígono.