Dende as 12:00h desta mañá de martes 1 de outubro, as chuvias comezaron a bater a cidade da Coruña. Pero a cousa aínda vén máis complexa de cara a este mércores, pois a entrada dun río atmosférico deixará intensas e xeneralizadas precipitacións ao longo de toda a xornada, especialmente na nosa provincia.

A predición de Meteogalicia apunta a un mércores de fortes choivas similar ao vivido ao mesmo día da pasada semana, no que a Comunidade galega experimentou unha xornada moi húmida. Na Coruña estará baixo a alerta amarela por chuvias, onde se esperan acumulacións de auga de ata 40 litros en 12 horas.

Aínda que desligado da treboada Isaac que atravesa o Atlántico, un río húmido de latitude moi baixa procedente do Caribe traerá a choiva a Galicia nun mércores de temperaturas suaves, con mínimas de entre 16 e 18 graos e máximas de ata 22 graos centígrados.

Agárdase unha mellora da estabilidade a medida en que caia a noite do mércores, que dará paso a un xoves no que se espera a entrada dun anticiclón que deixará tempo seco de cara ao final da semana.