O alcalde de Abegondo, José Antonio Santiso Miramontes, convocou aos municipios polos que pasa a autoestrada AP-9 para estudar “a viabilidade de obter novos beneficios para todos os concellos polos que transcorre esta autoestrada”.
No propio escrito remitido aos municipios, lémbrase que os afectados polo paso da autoestrada AP-9 “lograron o obxectivo de recadar o importe total do IBI, tras a reclamación realizada a comezos deste ano”. “Desta maneira, a concesionaria Audasa pagará o 100% do imposto mentres que antes os concellos só percibían un cinco por cento”, lembra.
Agora, engade, convoca o encontro “para darlle continuidade ao asunto relacionado co IBI e co fin de estudar a viabilidade de obter novos beneficios para todos os concellos polos que transcorre esta autoestrada “.
Na orde do día do xoves, con presenza de membros do equipo xurídico que lles asesoran neste asunto, figuran: a reclamación de atrasos, a actualización do valor catastral de 2007 e bonificación a residentes no territorio, similar á que se aplica no País Vasco, Cataluña e Valencia.
Sobre os atrasos no IBI, fontes municipais precisaron a Europa Press que a exención do 95% terminou en agosto de 2023. No caso da provincia da Coruña, a Deputación, como entidade que asume a recadación, virou xa o 2024 sen exención a Audasa, pero nos últimos meses de 2023 Abegondo xa o reclamou pola súa conta.
“Tamén se busca reclamar a actualización catastral da AP-9 xa que actualmente data de 2007 e pedir bonificacións para os residentes nos municipios afectados“, sinalan.
