Un simulacro de incendio nos concellos da Coruña e Arteixo coordinado coa empresa Repsol testará o vindeiro martes ás 10,00 horas o sistema de alerta masiva á cidadanía a través do envío de mensaxes aos seus teléfonos móbiles.
A iniciativa foi presentada este xoves polo conselleiro de Presidencia, Xustiza e Deportes, Diego Calvo, nunha rolda de prensa na que tamén participou o director xeral de Emerxencias e Interior, Santiago Villanueva.
O simulacro empezará ás 10,00 horas e consistirá nun incendio simulado nas instalacións de Repsol Butano que obrigará a activar o plan de emerxencias exterior do parque industrial.
Desta forma, ensaiarase a resposta a un fallo mecánico dunha cisterna de propano que provoca un incendio con varias persoas feridas, así como un accidente de tráfico na zona entre un vehículo e unha furgoneta con traballadores.
A novidade deste exercicio consistirá na proba do sistema ‘É-Alert’, que permite o envío masivo de mensaxes á cidadanía a todos os móbiles en caso de emerxencia. Así, recibirano as persoas que se atopen nos municipios limítrofes de Oleiros, Culleredo, A Laracha e Carballo, ademais de Arteixo e A Coruña.
Todos eles, terán unha mensaxe nos móbiles que lles informará do que está a pasar e como deben actuar, aclarando que se trata dunha proba. Ademais, funcionará un sistema de sirenas para pedir á veciñanza da contorna máis próxima ao exercicio a que adopte medidas de autoprotección en caso de emerxencia real.
A recepción da mensaxe no móbil activará un asubío continuo e fará vibrar os teléfonos, mesmo se están en modo silencioso ou bloqueados. Unha vez lido, os usuarios deberán presionar en ‘aceptar’ sen levar a cabo ningunha acción dadicional.
Será a segunda ocasión que se ensaia esta ferramenta de alerta masiva en Galicia tras o exercicio feito en outubro de 2022 no concello ourensán de Maceda e os limítrofes de Baños de Molgas, Esgos e Vilar de Barrio.
Os responsables da Xunta incidiron que o exercicio vai máis aló de avaliar a eficacia das ferramentas, pois tamén se busca que a cidadanía coñeza e familiarícese co seu uso.
