O Sindicato de Estudantes convocou unha folga xeral para este venres 11 de outubro para protestar contra a nova Proba de Acceso á Universidade (PAU), así como concentracións por toda España. En Galicia, están convocadas na Coruña, Ferrol e Ourense.
Segundo alegan nun comunicado, o alumnado de 2º de Bacharelato aínda non sabe como serán as probas da coñecida como Selectividade.
e aseguran que, a pesar de levar xa un mes de curso, a “única información” da que dispoñen é que os exames se celebrarán os días 3, 4 e 5 de xuño.
“O Ministerio de Educación e as Consellerías educativas manteñen un silencio intolerable. En lugar de presentar os cambios e novidades antes de arrincar o curso, permitindo ao profesorado preparar ben os contidos académicos e garantir que o estudiantado teña facilidades, atopámonos con que a principios de outubro aínda non sabemos nada”, insisten.
Aproveitan ademais as concentracións para denunciar as cargas policiais nunha manifestación estudantil en Murcia, que cualifican de “brutalidade”. “Como é posible que se trate así a estudantes pacíficos? Decenas de antidisturbios, pelotas de goma, porrazos e mozas en urxencias; así é como se responde ás lexítimas demandas estudantís?”, pregúntanse.
Esixen “xuízo e castigo” para os policías implicados na intervención e a súa “expulsión inmediata do Corpo”, así como a dimisión da Delegada do Goberno de Murcia e do Ministro do Interior, Fernando Grande Marlaska.
“O Ministerio e as Consellerías están a rirse na nosa cara e están a xogar coa saúde mental e o futuro de decenas de miles de estudantes, engadindo aínda máis dificultades, máis tensións e máis incerteza a unha proba cuxa razón de ser é converter o acceso á Universidade nun privilexio de clase”, afirman.
Ademais das concentracións nas cidades, o sindicato chama aos estudantes de secundaria, bacharelato e FP a organizar accións nos institutos.
