A Executiva do PSOE da Coruña aprobou na tarde deste venres de forma definitiva a lista cos nomes dos 24 delegados que acudirán por esta provincia ao Congreso Federal que o PSOE celebrará o 29 de novembro en Sevilla.
En concreto, tal e como avanzou ao comezo da semana o PSdeG, a lista está encabezada polo secretario provincial, Bernardo Fernández –os dirixentes provinciais lideran as listas da Coruña, Pontevedra e Ourense, mentres que os socialistas de Lugo cederon o primeiro posto ao xefe de filas do PSdeG, José Ramón Gómez Besteiro--.
O segundo posto é para a concelleira coruñesa Noemí Díaz; mentres que o presidente da Deputación e exsecretario xeral, Valentín González Formoso, ocupa o terceiro posto dunha lista na que hai nomes como o do que foi responsable de organización do partido a nivel galego e actual concelleiro na Coruña, José Manuel Lage.
O cuarto posto está ocupado pola vicesecretaria xeral do PSOE compostelán, Marta Álvarez-Santullano; o quinto, polo alcalde de Cerceda, Juan Manuel Rodríguez García; e o sexto, pola concelleira de Carnota Merche Noceda. En sétimo lugar figura o secretario de Organización da provincia, Diego Fernández; o oitavo, pola socialista de Muros Caridad González Cerviño; o noveno, polo secretario xeral do PSOE compostelán, Aitor Bouza; e o décimo pola subdelegada do Goberno na provincia, María Rivas.
O número 11 correspóndese co alcalde de Ames, Blas García; o 12 coa socialista de Vimianzo Paula Mouzo; o décimo terceiro co concelleiro herculino José Manuel Lage; o décimo cuarto coa secretaria de Organización adxunta do PSdeG, Ana Pena; e o décimo quinto co exalcalde de Ferrol Angel Mato.
Completan a lista, por orde, Alejandra Pérez Márquez (Bergondo), José Ramón Romero García (Boiro), Jimena Sierra (Xuventudes), José Ramón Rioboo (Culleredo); Carmen Vila Branco (Carballo), José Manuel Pérez Abelenda, Silvia Fraga Santos, Diego Luís Díaz Méndez e María José Cal Álvarez.
A lista foi aprobada nunha reunión extraordinaria da executiva provincial convocada para as 18,30 horas na sede da Agrupación de Santiago e na que o único punto da orde do día era a ratificación dos nomes da delegación provincial.
