A CIG convocou unha folga indefinida no Servizo de Axuda non Fogar (SAF) do concello coruñés de Arteixo a partir do 28 de outubro, un paro que afectará as traballadoras adscritas á empresa Osventos e que vén motivado polas “graves deficiencias” no servizo que denuncia a central sindical.

Segundo detallou o sindicato nunha nota de prensa, as traballadoras reclaman que a empresa abone os seus salarios antes de final de mes pero, “despois de meses de escusas, o problema continúa e as traballadoras cobran sempre ao límite do que establece o convenio”.

Así mesmo, o persoal denunciou que “hai un exceso de traballo con cuadrantes que non cumpren o descanso de xornada diaria e con contratos en fraude de lei”.

Nesta liña, a CIG fixo fincapé en que a empresa “non está a pór” a disposición do persoal as axudas técnicas recollidas no prego de condicións e que as traballadoras teñen que actuar en “condicións penosas” e con risco para a súa saúde.

De feito, incidiu en que as baixas por enfermidades músculo esqueléticas son as máis habituais neste sector polo esforzo físico que “deben realizar as traballadoras”.

Con todo, CIG-Servizos concluíu que a concelleira de Servizos Sociais debe “deixar de falar mal das traballadoras nos plenos” e que “mire polos dereitos” destas e das persoas usuarias deste servizo.