Dous homes, un pai e un fillo, foron detidos tras fuxir na Coruña da Policía Nacional, que buscaba a un deles como suposto autor dun delito de malos tratos, segundo fontes policiais consultadas por Europa Press.

O incidente, no que un dos axentes tivo que realizar dous disparos ao aire, produciuse a última hora da tarde do mércores, a partir das 21.00 horas, no barrio de Matogrande. Tras o seu pase a disposición xudicial nas últimas horas, a maxistrada do Xulgado de Instrución número 3 da Coruña, en funcións de garda, decretou a súa posta en liberdade.

O pai está investigado por un delito de resistencia e o fillo por outro de desobediencia. O primeiro, no entanto, ingresou en prisión porque tiña unha requisitoria de ingreso no cárcere emitido polo Xulgado do Penal número 4 da Coruña.

Ademais, deduciuse testemuño ao Xulgado de Violencia sobre a Muller pola posible comisión dun delito grave de ameazas sobre a súa muller, que foi quen alertou á Policía.

Ao principio, declarou que a ameazou con matala cunha arma. Posteriormente, negou a existencia da mesma — tampouco foi intervida — e asegurou que alertara ao corpo policial para que ingresase en prisión porque era coñecedora da requisitoria, motivo polo que fuxiron dos axentes.

Inicialmente, os axentes da Policía Nacional recibiron o aviso por un caso de violencia de xénero, pero ao presunto autor localizárono xa no interior dun coche, como copiloto, e conducido por outra persoa.

Ao darlle o alto, emprenderon a fuxida con manobras evasivas e en dirección contraria, precisaron as fontes consultadas. Daquela o copiloto saíu correndo e foi nese momento cando un axente realizou dous disparos ao aire para que parase e ao alertar a vítima nun primeiro momento de que podía ir armado.