A asemblea de traballadores e traballadoras de Navec, empresa que realiza servizos de mantemento na refinaría da Coruña e noutras industrias da comarca, acordou convocar folga a partir do 18 de outubro para esixir garantías no cobro das súas nóminas.

A empresa, “que xa viña arrastrando atrasos no ingreso dos soldos”, sinala a CIG, atópase en concurso de acredores desde o pasado 27 de setembro.

“Polo que, ante a falta de información concreta sobre o abono das nóminas e a continuidade dos empregos, o persoal acordou iniciar mobilizacións para reclamar un plan de viabilidade”, engade.

A central sindical afirma que se atopan a día de hoxe “nun contexto de total incerteza xa que a administración concursal comunicou aos comités de empresa de todo o grupo Navec que non saben o día no que se poderán pagar as nóminas, así como a súa intención de iniciar os trámites dun ERE concursal”.

A CIG, que ostenta a maioría do comité, está en comunicación coa administración concursal e persoal no xulgado de mercantil de Tarragona para seguir o desenvolvemento do proceso “e velar para que se respecten os dereitos do persoal”.