A alcaldesa da Coruña, Inés Rey, recalcou a “aposta” do Concello para que a cidade herculina sexa unha das sedes do Mundial 2030 e asegurou que vai traballar para “pór de acordo ás administracións” á hora de afrontar o investimento do financiamento integral do estadio de Riazor. “Pasamos esa primeira fase de selección e agora traballaremos, despois de ter a garantía do investimento privado para o estadio, para pór de acordo ás administracións á hora de afrontar o investimento”, explicou a rexedora a preguntas dos xornalistas sobre a repartición da mesma.
Unha achega económica que, segundo sinalou, “non só é positiva para o estadio e para a cidade senón tamén moi positiva para Galicia”. En canto ao rexeitamento da Deputación da Coruña á proposta da Xunta de asumir o 70 % do investimento a partes iguais entre o Concello, o Consello Superior de Deportes (CSD) e o ente provincial, a alcaldesa apuntou a súa negativa a “entrar en ningún tipo de polémica máis”.
