A Facultade de Dereito da Universidade da Coruña (UDC) acollerá o vindeiro martes, día 29, as xornadas ‘Os riscos da Intelixencia Artificial: Estamos seguros?’, no marco da Cátedra Fundación Inade-UDC. Segundo informa a institución, o encontro, que se celebrará de 09.30 a 12.30 horas, contará coa asistencia do vicerreitor de Titulacións e Internacionalización da UDC, Moisés Canal; o presidente da Fundación Inade, José Ramón Santamaría; a directora da Oficina Económica de Galicia IGAPE, Natalia Barros; o director xeral da Axencia Española de Supervisión da Intelixencia Artificial (Aesia), Ignasi Belda; e o da Cátedra Fundación Inade-UDC, Fernando Pena López.
Durante as xornadas, engade, terá lugar a presentación do IX volume da colección Cadernos da Cátedra Fundación Inade-UDC, co título ‘Os riscos xerados pola Intelixencia Artificial e os posibles mecanismos para a súa mutualización’. Esta obra, elaborada por Gabriel Macanás, doutor en Dereito Civil pola Università dei Bologna e profesor de Dereito Civil na Universidade de Murcia, reflexiona sobre os desafíos éticos, sociais, económicos e legais que supón a IA, así como sobre as solucións que se poderían implantar para garantir que os danos causados por esta tecnoloxía poidan ser compensados de maneira idónea. A continuación, terá lugar unha mesa redonda con persoal experto, na que se abordarán os riscos da IA e o papel que desempeñará o sector asegurador na súa transferencia, apunta a UDC.
