A alcaldesa da Coruña, Inés Rey, reclamou recursos para os concellos ao considerar que “a política de proximidade padece de falta de financiamento”. Fíxoo ao abrir o almorzo-coloquio do presidente da Federación Galega de Municipios e Provincias (Fegamp), Alberto Varela, organizado por Nordés Club Empresarial sobre financiamento e administración local.

Rey puxo sobre a mesa “a falta de recursos económicos” e a “problemática común” a todos os concellos, con independencia do punto xeográfico ou formación política dos seus rexedores e rexedoras, respecto doutras administracións. “A política de proximidade padece de falta de financiamento, mentres os recursos están na política de distancia”, sentenciou.

Tamén expuxo que o financiamento é un eixo prioritario para as federacións de Municipios e Provincias, tanto a nivel estatal como galego e puxo en valor o traballo das entidades a favor dos concellos. Así mesmo, destacou o poder das urbes como exemplo de municipalismo. “Non é casualidade que as cidades que máis avanzan sexan as que poñen por diante a política local e de progreso, poderiamos ir a máis cun financiamento acorde á nosa importancia, algo necesario porque está en xogo o progreso de Galicia”, concluíu.