Unha testemuña do xuízo pola malleira mortal a Samuel Luiz — ocorrida na madrugada do 3 de xullo de 2021 no paseo marítimo coruñés –– confirmou que viu “a unha persoa que estaba no chan, recibindo patadas e golpes”. “Lembro xente ao redor lanzando patadas”, concretou outro.

Nos seus testificales — nesta quinta sesión foron cinco as persoas que declararon por estar ese día na zona — cualificaron de “pelexa” o que viron inicialmente aínda que logo un mozo especificou que máis preto comprobou que “un caeu ao chan” e que lembra ver á vítima xa con posterioridade “con sangue na boca”.

“Eu pensei que o mozo estaba inconsciente, que era unha pelexa normal e non lle dei a gravidade que estaba a ser ata que ao día seguinte vin as noticias”, admitiu unha das cinco testemuñas tras afirmar que el axudou tamén a Samuel, desprazándooo desde a rúa ata a beirarrúa cando acabou a agresión, segundo as acusacións.

“Si, marcharon”, ratificou ao ser preguntado pola fiscal se Samuel cando caíu esborrallado, algúns dos seus agresores saíron correndo.