No marco do Día das Bibliotecas, o equipo de Normalización Lingüística da cidade organiza o vindeiro sábado 26 de outubro unha nova edición do AgoraSón de outono, un evento cultural xa clásico destas datas no Centro Sociocultural Ágora, e que nesta ocasión contará con Mercedes Peón en concerto, ás 21.00 horas.
Poden pasar a recoller as invitacións, que se repartirán, ata esgotárense, co préstamo de material en lingua galega (libros, películas, CDs de música etc.) nas bibliotecas municipais no horario de apertura de cada centro.
586 Cantos
Ademais, a cultura galega terá outra cita o 16 de novembro, ás 20 horas, no Teatro Colón. O teatro herculino acolle 586 cantos, o espectáculo audiovisual con música en directo producido polo Museo do Pobo Galego que homenaxea as voces do Cancioneiro Popular Galego. A cita é de balde previa reserva de convite.
O espectáculo é unha idea orixinal da Mostra Internacional de Cinema Etnográfico MICE Museo do Pobo para pór en valor o papel da poesía popular oral e das cantareiras, que protagonizarán o Día das Letras Galegas 2025, e para valorizar os arquivos que albergan o patrimonio inmaterial galego. Segundo explicou hoxe na presentación do ciclo a responsable do DEAC do Museo e directora da MICE, Ana Estévez Lavandeira, a peza toma como punto de partida o legado que Dorothé Schubarth doou ao Museo do Pobo Galego hai agora unha década, en setembro de 2014: gravacións sonoras, fotografías, transcricións de textos e partituras froito do traballo de campo levado a cabo entre os anos 1978 e 1984 pola etnomusicóloga coa colaboración de Antón Santamarina. Ese material, que serviu de base para os sete volumes do Cancioneiro Popular Galego, editado pola Fundación Barrié, compón a montaxe audiovisual realizada por Laura Piñeiro e Fran Rodríguez Casal, cineastas da Asociación Memoria e Cinema. Unha montaxe que se combina no espectáculo coa reinterpretación desas músicas tradicionais da man de Richi Casás, neto e sobriño neto de dúas das portadoras, Rosa e Adolfina Casás Rama, e que estará acompañado no directo de Fran Barcia, Tania Caamaño e Antía Ameixeiras.
