A Audiencia Provincial da Coruña ratificou unha sentenza que condena a un home a un ano e tres meses de prisión por un delito de acoso, coa agravante de reincidencia, á directora dun centro educativo coruñés, por difundir correos electrónicos e panfletos “coa finalidade de desacreditala profesionalmente e danar a imaxe do colexio”.

O home xa tiña dúas condenas previas polos mesmos feitos. Agora, deberá pagar ao redor de 6.000 euros de multa por un delito de quebrantamento de condena e outro de calumnias por publicidade. Ademais, non poderá aproximarse a menos de 200 metros da vítima nin comunicarse con ela por tempo de cinco anos. Deberá tamén pagarlle unha indemnización de 7.500 euros polos danos morais causados.

De acordo coa sentenza ditada polo Xulgado do penal número 1 da Coruña, o home, a pesar de non ter vinculación con centro educativo, “comezou unha campaña” contra o colexio por mor dun xuízo penal en que unha profesora interveu como testemuña e el resultou condenado. Fíxoo “focalizando as súas accións na persoa da directora, remitindo numerosos colexios electrónicos a entidades e institucións relacionadas co mundo educativo” e “coa finalidade de desacreditala profesionalmente e danar a imaxe do colexio”.

Por este motivo, en 2021, un auto prohibiulle comunicarse coa muller e aproximarse tanto a ela como ao centro. Así mesmo, “como consecuencia da persistencia no seu comportamento”, dita medida foi agravada e dous xulgados do penal ditaron senllas sentenzas de acoso en febreiro de 2022 e marzo de 2023.

A pesar diso, o acusado, continuou con “unha estratexia sistemática de fustrigación” e “desde o mes de febreiro de 2022 e polo menos ata o mes de abril de 2023, proseguiu coa mesma actitude”, remitindo “numerosos correos electrónicos” e os que hostigaba de maneira “sistemática e insistentemente” á muller , “mencionándoa expresamente ou aludindo ao cargo de directora que ocupaba no devandito momento”. Ademais, repartiu panfletos contrarios á vítima entre pais e alumnos do centro.

Así, o Xulgado do Penal número 1 da Coruña condenou ao individuo en abril, aínda que lle absolveu do delito de inxurias. O home apelou á Audiencia Provincial alegando, entre outros motivos, “vulneración do dereito á intimidade, o segredo das comunicacións e á protección de datos”, así como de tutela xudicial efectiva.

Argumentaba, ademais, que “os correos non ían dirixidos á querellante” e que non quebrantara a prohibición de comunicarse con ela. A pesar diso, a Audiencia Provincial desestimou os seus argumentos e confirmou a sentenza.