A Xunta licitou este xoves por 2,6 millóns a instalación da estrutura flotante de O Parrote, na Coruña. A plataforma permitirá habilitar unha zona de baño “segura” neste “emblemático espazo” da cidade, segundo destaca a consellería nun comunicado.
A preguntas dos xornalistas sobre o atraso desta actuación, o presidente da Autoridade Portuaria da Coruña, Martín Fernández Prado, aclarou que en 2022 “anunciouse unha idea”, pero “son moitos os trámites que houbo que facer ata hoxe”.
Pola súa banda, a titular de Vivenda precisou que este xoves sae a licitación no perfil do contratante cun período de presentación de oferta ata o 19 de novembro e período de execución sinxela de 8 meses. “Por tanto contamos con que a obra poida estar no próximo verán de 2025 para o goce desa etapa estival que é o que todos desexamos”, destacou.
