Cos votos en contra de PP e PSOE e a abstención do BNG, o grupo de goberno de Alternativa dos Veciños aprobo no pleno de onte os orzamentos do Concello de Oleiros para o ano 2025, de 47.850.000 euros.

Máis da metade deses cartos destinaranse á conservación e mantemento dos equipamentos e servizos públicos, cun gasto de 12 millóns en persoal e de 15 millóns en gasto corrente. 

No referido a obras públicas o investimento, serán 17,2 millóns que servirán para mellorar o espazo público viario, a accesibilidade, infraestruturas de saneamento, iluminación, pluviais, condución de augas, eficiencia enerxética,… Tamén se prevé, entre outras actuacións, a senda costeira entre Naval e Canide, un aparcadoiro próximo á zona do Seixo Branco, importantes melloras no campo de fútbol O Redondo de Montrove e a segunda anualidade do edificio multiusos de Bastiagueiro. Este capítulo nútrese de diversas achegas da Deputación, da venda de solo municipal e dun crédito bancario do que se fixará o seu importe exacto cando se incorporen os remanentes xerados este ano.

En canto aos ingresos hai unha alza xeneralizada agás no referido a taxas, prezos públicos e outros ingresos, que descenden polas cotas de urbanización que se prevían no 2024 e non se contemplan para o próximo ano. Os orzamentos inclúen xa a actualización de taxas e impostos, que levaban sen modificarse entre 9 e 21 anos, que pasan a estar equiparados aos demais concellos da área metropolitana.