A Xunta propuxo unha sanción de 3.000 euros á familia Franco por non abrir ao público a Casa Cornide, situada na zona da Cidade Vella na Coruña. Así o informaron fontes autonómicas consultadas por Europa Press que precisaron que se lles notificou unha proposta de resolución e que agora a familia do ditador ten un prazo de 15 días para presentar alegacións.

Isto despois de que antes do verán a Administración galega lles reclamase, nun escrito remitido por correo ordinario, a apertura do inmoble en cumprimento da lexislación tras a súa declaración como Ben de Interese Cultural (BIC). Mentres, o consistorio herculino mantén, á súa vez, iniciados os trámites para recuperar para o patrimonio municipal o edificio, cuxa propiedade ostentan na actualidade o Franco.