O adro do Centro Ágora acolle ata o vindeiro 15 de novembro a exposición “Mulleres do medievo galego”. Un proxecto encargado pola Deputación da Coruña que consta de 21 paneis, o primeiro introdutorio e o resto son dez láminas ilustradas e os 10 respectivos textos, que permiten coñecer e pór rostro a diferentes mulleres decisivas do Reino da Galiza é fundamental para coñecer a nosa historia medieval.

Unha exposición que se combina á perfección coa proxección do documental “Inês, aquilo que nos une”, feita por MJ Pérez, que se poderá o vindeiro martes 12 de novembro no local da Asociación de Veciños da Agra do Orzán (rúa Entrepenas 38 soto).

A exposición

A expo recolle a historia de Ilduara Eiriz, Sancha I, Dona Urraca, Lupa Pérez de Traba, Tareixa Alfonsez, Maior Guntroda Rodríguez, Sancha II, Aldonça I, Inés Pires de Castro, María Castaña e María, a Balteira.
En obras realizadas por inco destacadas artistas contemporáneas da Galiza. Elas son: Iria Fafián (1988), muralista e ilustradora, coñecida polos seus proxectos de caixas de luz; Laura Romero (1991), ilustradora, urban sketcher, presidenta da Asociación Galega de Profesionais da Ilustración (AGPI) e baixista de Zënzar; María Montes (1987), auxiliar de veterinaria e ilustradora merecedora do premio ao Mellor Libro Ilustrado na Gala do Libro Galego 2020; Nuria Díaz (1982), que conta cunha fonda traxectoria en diferentes ámbitos da ilustración e encargas moi diversas, desde traballo editorial até ilustración de produto; e Minia Regos (1983), muralista e ilustradora, que ademais imparte obradoiros ao redor da lectura e da arte.

A exposición, como todas as actividades do programa “Agra no Ágora” son de acceso libre e gratuíto; o programa está financiado polo Concello da Coruña e deseñado en colaboración coa Asociación veciñal Agra.