A Garda Civil investiga a conexión ilegal á rede eléctrica de 15 almacéns no peirao de Oza, no porto da Coruña, no marco dun dispositivo de inspección e control realizado polo destacamento de Fiscal e Fronteiras do porto, e en colaboración coa Policía Portuaria. Así, entre os meses de setembro e outubro pasados, levaron a cabo diversas inspeccións, nas que tamén participaron técnicos da compañía eléctrica afectada, e nas que se detectaron casos de defraudación do fluído eléctrico en 15 almacéns do peirao, dun total de 52 que foron inspeccionados.
Eses 15 almacéns estaban ilegalmente conectados á rede xeral, polo que se procedeu ao corte da subministración para pór fin á fraude e evitar riscos de incendio xerados por sobrecargas ou ausencia de medidas de seguridade en enganches irregulares. A compañía eléctrica estimou o custe da fraude nuns 45.450 euros. No marco deste operativo policial abríronse dilixencias contra 17 persoas, investigadas como presuntas autoras de 15 delitos de defraudación do fluído eléctrico. Ademais, tamén se tramitaron dilixencias por 26 posibles infraccións administrativas relacionadas coa normativa de seguridade industrial, medio ambiente, e normativa de Portos do Estado.
