Unha das entidades que mellor traballa coas comunidades migrantes da cidade é, sen dúbida, Ecos do Sur. Leva dendende 1991 a pé de rúa, na Agra do Orzán e o Ventorrillo (nos últimos anos con sede na Avenida de Fisterra a altura do Paseo das Pontes), vivindo de primeira man o aumento da poboación doutros países nos nosos barrios.
Hoxe a entidade está de noraboa, pois acaba de saber que a Delegación do Goberno en Galicia vén de outorgarlle un dos Recoñecementos Meninas de Galicia. Así llo comunicou o delegado Pedro Blanco, que trasladou a boa nova tamén ao maxistrado Fernando Lousada; a maxistrada e activista afgana Rahima Sabiri; a Asociación Axel de Lugo; o Centro Alumar de Cáritas de Ourense e a editora pontevedresa Teresa Zataraín.
Blanco destacou que estes recoñecementos que se conceden en Galicia desde o 2018 no marco do Día Internacional contra a Violencia de Xénero 25N, “representan a unha Galicia feminista, que rexeita o machismo e a violencia que se exerce contra unha muller polo feito de selo e que loita pola igualdade en todos os ámbitos”.
Da ONG herculina destaca os seus máis de 30 anos de compriso e traballo en programas de erradicación da violencia sobre as mulleres e as nenas, con especial atención á trata de mulleres e a explotación sexual e económica. Nestes casos, a organización ofrece servizos para que as mulleres poidan saír desas situacións de violencia e refacer as súas vida.
O vindeiro 22 de novembro será a gala de entrega dos recoñecementos no Hostal dos Reis Católicos, en Santiago de Compostela.
Máis novas
‘Mulleres Afronte’, a arte feminina como ferramenta de transformación social
